Deu 33 | NdeIBE | STEP | Lesi yiso isibusiso esethulwa nguMosi umuntu kaNkulunkulu kwabako-Israyeli engakafi.

Deuteronomy 33

UMosi ubusisa izizwana zako-Israyeli

1 Lesi yiso isibusiso esethulwa nguMosi umuntu kaNkulunkulu kwabako-Israyeli engakafi. 2 Wathi: “UJehova wehla evela eSinayi njalo wakhazimula kubo ngaseSeyiri; wakhanyisa njalo kusiya eNtabeni yasePharami. Weza labanengi babangcwele bevelela eningizimu, emehlweni ezintaba zakhe.

3 Ngempela nguwe othanda abantu, bonke abangcwele basezandleni zakho; Ezinyaweni zakho bayakhothama bonke bamukele iziqondiso ezivela kuwe,

4 umthetho esawuphiwa nguMosi, inotho yebandla likaJakhobe.

5 Wayeyinkosi phezu kukaJeshuruni lapho abakhokheli babantu bebuthene, ndawonye lezizwana zako-Israyeli.

6 “Kaphile uRubheni njalo angafi, abesilisa bakhe bangaphunguki babe balutshwana.”

7 Lokhu wakutsho ngoJuda: “Zwana, wena Jehova wami, ukukhala kukaJuda; mlethe ebantwini bakhe. Ngezandla zakhe uvikela lokho akumeleyo. Yebo, msize amelane lezitha zakhe!”

8 NgoLevi wathi: “Thumimi kanye le-Urimi ngokwaleyondoda owayithandayo. Wamhlola eMasa; waba laye emachibini aseMeribha.

9 Wathi ngoyise lonina, ‘Angilandaba labo mina’ Kazange akwamukele ukuthi ulabafowabo njalo kazange ananze abantwabakhe, kodwa walilondoloza ilizwi lakho wasigcina isivumelwano sakho.

10 Ufundisa amanyathelo akho kuJakhobe lomthetho wakho ku-Israyeli. Unikela ngempepha phambi kwakho langeminikelo egcweleyo yokutshiswa e-alithareni.

11 Busisa bonke ubuciko bakhe, Jehova, ujabule ngomsebenzi wezandla zakhe. Zitshaye izinkalo zalabo abamvukelayo; zitshaye izitha zakhe zingaphindi zimvukele.

12 NgoBenjamini wathi: “Yekelani othandekayo kaJehova aphumule kuye evikelekile, ngoba umvikela ilanga lonke, kanti njalo lowo uJehova amthandayo uphumula emahlombe akhe.”

13 NgoJosefa wathi: “Sengathi uJehova angabusisa umhlaba wakhe ngamazolo aligugu avela phezulu ezulwini langamanzi ajulileyo ageleza ngaphansi;

14 langobuhle obuyingqala obulethwa lilanga kanye lokucoleka okungalethwa yinyanga;

15 lezipho zekhethelo zasezintabeni zendulo lokuthela kwezithelo zamaqaqa emi nini lanini;

16 langezipho eziyingqala zomhlaba lokugcwala kwawo lozwelo lwakhe yena owayesesixukwini esivuthayo. Konke lokhu akube sekhanda likaJosefa, ebunzini lobuso benkosana phakathi kwabafowabo.

17 Ebukhosini unjengenkunzi encane elizibulo; izimpondo zakhe zinjengezenyathi. Ngazo uzagweba abhuqe izizwe, aze agwebe lalezo ezisemaphethelweni omhlaba. Banjalo abezinkulungwane zamatshumi baka-Efrayimi; banjalo abezinkulungwane zikaManase.”

18 NgoZebhuluni wathi: “Jabula, Zebhuluni, ekuphumeni kwakho, lawe wena, Isakhari, emathenteni akho.

19 Bazabizela abantu ezintabeni khonale banikele imihlatshelo yabo yokulunga; bazakudla baminze ngobunengi bokusolwandle ngawo amagugu afihlakele etshebetshebeni.”

20 NgoGadi wathi: “Ubusisiwe lowo oqhelisa umbuso kaGadi! UGadi uhlala khona njengesilwane, edlithiza engalweni loba ekhanda.

21 Wazikhethela umhlaba omuhle okudlulayo waba ngowakhe; isabelo somkhokheli sagcinelwa yena. Kwathi ekuhlanganeni kwabakhokheli babantu, wakwenza lokho okufunwa nguJehova olungileyo, kanye lokwehlulela kwakhe kwabako-Israyeli.”

22 NgoDani wathi: “UDani ngumdlwane wesilwane, otshakala uphuma eBhashani.”

23 NgoNafthali wathi: “UNafthali uyaphuphuma ngozwelo lukaJehova njalo ugcwele izibusiso zakhe; elakhe ilifa uzazuza kusiya eningizimu ngechibini.”

24 Ngo-Asheri wathi: “Obusisiweyo kakhulu kulawo wonke amadodana ngu-Asheri; ababelozwelo kuye abafowabo, myekeleni ageze izinyawo zakhe emafutheni.

25 Amabhawudo emasangweni akho azakuba ngawensimbi lethusi njalo amandla akho azalingana izinsuku zakho.

26 “Kakho ofana loNkulunkulu kaJeshuruni, ophezulu emazulwini ukuze akuncede kanti njalo lasemayezini ngobukhosi bakhe.

27 UNkulunkulu oyisimakade uyisiphephelo sakho, njalo ngaphansi kuzingalo ezingelakuphela. Uzazixotsha izitha phambi kwakho esithi, ‘Mbulale!’

28 Ngakho u-Israyeli uzaphila yedwa evikelekile, Umthombo kaJakhobe uvikelekile, elizweni lamabele kanye lewayini elitsha lapho amazulu phezulu akhithizela khona amazolo.

29 Ubusisiwe wena, We Israyeli! Ngubani onjengawe, abantu abahlengwa nguJehova? Ulihawu lakho lomsizi wakho njalo uyinkemba yakho ekhazimulayo. Izitha zakho zizatshotshobala phambi kwakho njalo uzazinyathela phansi zonke izindawo zabo zokukhonza eziphakemeyo.”